სამართალი
ოკუპირებულ ტერიტორიებზე ყველა ქმედებაზე, რომელიც დაკავშირებულია უკანონობასთან, რუსეთია პასუხისმგებელი! - საქართველოს თავდაცვის მინისტრი

     საქართველო, 24 აპრილი, საქინფორმი. ლევან იზორია რუსეთის საგარეო საქმეთა სამინისტროს სპეციალური წარმომადგენლის მარია ზახაროვას განცხადებას ეხმაურება.
ბავშვმაც კი იცის, რომ საქართველოს ტერიტორიების 20% სწორედ რუსეთის ფედერაციის მიერ არის ოკუპირებული. ამას ქართველი არ შეეგუება, ამიტომ ყველა საკითხთან მიმართებაში, რომელიც ჩვენი ქვეყნის ტერიტორიული მთლიანობის და სუვერენიტეტის დაცვას უკავშირდება, ჩვენ გვექნება პრინციპული პოზიცია ჩვენს საერთაშორისო პარტნიორებთან ერთად. მკაფიოდ ვაცხადებთ, რომ ოკუპირებულ ტერიტორიებზე კონტროლს სწორედ რუსეთი ახორციელებს, ამიტომ ყველა ქმედებაზე, რომელიც დაკავშირებულია უკანონობასთან ჩვენი მოსახლეობის მიმართ, სწორედ რუსეთი არის პასუხისმგებელი. შესაბამისად, ამ კომუნიკაციაში, რომელიც მხოლოდ და მხოლოდ მშვიდობიან ურთიერთობაზეა ორიენტირებული, ჩვენი ხელისუფლების მხრიდან პოზიცია იქნება ურყევი, პრინციპული და შეუპოვარი, თუმცა, ამასთან ერთად, პრინციპული იქნება პოზიცია საერთაშორისოდ აღიარებული ნორმების და განსაკუთრებით ჩვენი მოქალაქეების უფლებების დაცვასთან დაკავშირებით“, - განაცხადა ლევან იზორიამ.