საქართველო, 6 ოქტომბერი, საქინფორმი. ღვინის ეროვნული სააგენტოს ცნობით, 2017 წლის იანვარ-სექტემბერში საქართველოდან მსოფლიოს 45 ქვეყანაში ექსპორტირებულია 52,7 მილიონი ბოთლი (0,75 ლ) ღვინო, რაც 63%-ით აღემატება გასული წლის ანალოგიურ მონაცემებს. რაც შეეხება ამ მონაცემების გამოსახვას რიცხვებში - იანვარ-სექტემბერში 116 მილიონი აშშ დოლარის ღვინო გავიდა ექსპორტზე, რაც წინა წლის მონაცემებზე 55%-ით მეტია.
ღვინის ეროვნული სააგენტოს თავმჯდომარე გიორგი სამანიშვილი ამ მონაცემებზე დაყრდნობით ამბობს, რომ წლის ბოლოს საქართველოდან ღვინის რეკორდული რაოდენობის ექსპორტი განხორციელდება.
საანგარიშო პერიოდში მსოფლიოს 18 ქვეყანაში ექსპორტირებულია 147 ათასი ბოთლი (0,5 ლ) ჭაჭა, ექსპორტის ზრდამ 131% შეადგინა. ჭაჭის ექსპორტით მიღებული შემოსავლები 439,3 ათას აშშ დოლარს შეადგენს, ზრდამ გასული წლის ანალოგიურ პერიოდთან შედარებით 83%-ს მიაღწია.