საზოგადოება
აზერბაიჯანელი ჟურნალისტი ნაცემია, ის, სავარაუდოდ, ქართულმა სპეცსამსახურებმა გაიტაცეს - ადვოკატის სკანდალური განცხადება

   საქართველო, 1 ივნისი, საქინფორმი. აზერბაიჯანელ ჟურნალისტს აფგან მუხთარლის თბილისში საცხოვრებელ სახლთან სამი პირი დაესხა თავს - ამ ინფორმაციას მისი აზერბაიჯანელი ადვოკატი ავრცელებს.

ელჩინ სადიყოვი ბაქოში უკვე შეხვდა მისი დაცვის ქვეშ მყოფს, რომელიც, ადვოკატის თქმით, ნაცემია.

ჟურნალისტის ვარაუდით, გამტაცებლები ქართული სპეცსამსახურების წარმომადგენლები იყვნენ.

„ის ნაცემია და ამბობს, რომ მოტეხილობებიც აქვს. ყვება, რომ თბილისში 3 ადამიანი დაესხა თავს, რომლებიც, მისი აზრით, ქართველები იყვნენ. მას თავზე ტომარა ჩამოაცვეს და სცემეს. ის ამბობს, რომ ეს ადამიანები სპეცრაზმელები იყვნენ. შემდეგ კი ბაქოში ჩამოიყვანეს და ჯიბეში ფული ჩაუდეს. ამჟამად მას ბრალად ედება საზღვრის უკანონოდ გადაკვეთა და კონტრაბანდა. დღეს გადაწყდება მისი წინასწარი დაკავების საკითხი”, - აცხადებს ელჩინ სადიყოვი.