საქართველო, 29 აპრილი, საქინფორმი. საქართველოს მთავარი პროკურატურის სამართალწარმოების პროცესში ჩადენილი დანაშაულის გამოძიების დეპარტამენტის გადაწყვეტილებით, დაზარალებულ მოქალაქეებს ქ. გორში მდებარე, უკანონოდ ჩამორთმეული 1 254 784 ლარის ღირებულების უძრავი ქონება დაუბრუნდებათ.
ჩატარებული გამოძიებით დადგენილია, რომ მოქალაქე ილია კაპანაძე და მისი ოჯახის წევრები ფლობდნენ სააქციო საზოგადოების 99% წილს, რომელსაც საკუთრებაში ჰქონდა ქ. გორში მდებარე 2159 კვ.მ ფართობის მიწის ნაკვეთი, მასზე განლაგებული შენობა-ნაგებობებით, საერთო ფართობით 998,7 კვ.მ.
2010 წლის 21 დეკემბერს დაზარალებულმა ილია კაპანაძემ და მისმა ოჯახის წევრებმა სააქციო საზოგადოების კუთვნილი უძრავი ქონება, რომლის საერთო ღირებულება 1 254 784 ლარს შეადგენს, უძრავი ქონების ჩუქების ხელშეკრულებით იძულებით გააჩუქეს სახელმწიფოზე.
უძრავი ქონების ჩამორთმევაში მხილებული პროკურორის მიმართ, რომელსაც დატოვებული აქვს პროკურატურის რიგები, გამოყენებულ იქნა დისკრეციული უფლებამოსილება.