საქართველო, 10 თებერვალი, საქინფორმი. საქართველოს თავდაცვის მინისტრმა თინათინ ხიდაშელმა საზოგადოებრივი მაუწყებლის პირდაპირ ეთერში „მოამბის“ კითხვებს უპასუხა. თავდაცვის მინისტრის ჩართვა ძირითადად საქართველოს ნატოში გაწევრიანების პერსპექტივებს შეეხო.

 „საქართველოს ამოცანა და მიზანი არ არის MAP (გაწევრიანების სამოქმედო გეგმა). ჩვენ, ქართული სახელმწიფო, არ ვითხოვთ MAP-ს და არ ვსაუბრობთ MAP-ზე. ჩვენი ამოცანა ძალიან მარტივია - ეს არის წევრობა“, - აღნიშნა თინათინ ხიდაშელმა.

 გადაცემის წამყვანის ვასილ ივანოვ-ჩიქოვანის შეკითხვაზე, რომელიც რუსეთის მხრიდან საქართველოს ნატოში გაწევრიანების დაბლოკვას შეეხო, თავდაცვის უწყების ხელმძღვანელმა, კერძოდ, უპასუხა: „რეალობები იცვლება იმის მიხედვით, როგორც იცვლება გარემო. ჯეიმს აპატურაიმ ძალიან გასაგებად თქვა თავის ინტერვიუში,  გეოპოლიტიკური ვითარების ცვლილების შესაბამისადო. ჩვენ დღეს უნდა ვემზადოთ იმისთვის, რომ ხვალ, როდესაც გაიხსნება ეს ფანჯარა საქართველოსთან მიმართებაში, ზუსტად ისე, როგორც გაიხსნა ბალტიისპირეთთან, პოლონეთთან, ჩეხეთთან მიმართებაში, კარს არავინ გაგვიღებს, რუსეთი ამას არასდროს დათანხმდება, მაგრამ ფანჯარა აუცილებლად გაიღება. ამიტომ ჩვენი ამოცანა არის ის, რომ ყველაფერი გავაკეთოთ ქართულმა სახელმწიფომ, რომ ნებისმიერ წამს, როდესაც გეოპოლიტიკური სურათი შეიცვლება, საქართველო მზად იყოს ამ ფანჯარაში შესასვლელად!“.