საქართველო, 8 იანვარი, საქინფორმი. მსოფლიოს ყოველი მეოთხე მკვიდრი (24%)  დარწმუნებულია, რომ დღეს ამერიკის შეერთებული შტატები გლობალური წესრიგის მთავარ საფრთხეს წარმოადგენს. ამას მოწმობს დამოუკიდებელი კვლევითი კომპანიების საერთაშორისო კონსორციუმი Worldwide Independet Network/Gallup International Association-ის მიერ ჩატარებული ყოველწლიური გლობალური კვლევა „წლის ბოლოს" შედეგები. ანალიზისათვის ინფორმაციად გამოიყენეს მსოფლიოს 65 ქვეყანაში ათას-ათასი მცხოვრების  გამოკითხვის შედეგები (სულ - 67 000 806 რესპონდენტი).

კვლევის თანახმად, მეორე ყველაზე აგრესიული სახელმწიფო პაკისტანია, რომელსაც მსოფლიოში მშვიდობისთვის ყველაზე დიდ საფრთხედ რესპონდენტთა 8% მიიჩნევს. ჩინეთმა მსოფლიოში ყველაზე საშიში ქვეყნების სამეული დააგვირგვინა - მას გამოკითხულთა 6% უფრთხის. მსოფლიოს ყოველი მეოცე მკვიდრი დარწმუნებულია, რომ ყველაზე დიდ საფრთხეს მსოფლიო წესრიგისათვის დღეს ავღანეთი, ირანი, ისრაელი და ჩრდილოეთ კორეა წარმოადგენენ, რომლებმაც გლობალურ სიაში  მეოთხე ადგილი გაიზიარეს.

ასევე აღსანიშნავია, რომ ამერიკის შეერთებულ შტატებს ყველაზე მებრძოლ სახელმწიფოდ მიიჩნევენ არა მხოლოდ ანტაგონისტური ქვეყნები და ამერიკული სამხედრო ინტერვენციით დაზარალებული ახლო აღმოსავლეთისა და ჩრდილოეთ აფრიკის სახელმწიფოები, არამედ ნატოს წევრი ქვეყნებიც, როგორიცაა თურქეთი და საბერძნეთი. თვით ამერიკის მოქალაქეთა 13%  დარწმუნებულია, რომ მათ ქვეყანას ყველაზე მეტად შეუძლია დაარღვიოს გლობალური სტატუს-კვო.